Ave Maria, secretly.
V. Deus, † in adjutórium meum inténde.
R. Dómine, ad adjuvándum me festína.
V. Glória Patri, et Fílio, et Spirítui Sancto.
R. Sicut erat in princípio, et nunc, et semper, et in sæcula sæculórum.
Alleluia or Laus tibi Domine, Rex æternæ gloriæ.
Ant. O admirábile commércium.
Psalm 92. Dominus regnavit
The Glory and Stability of the Church of Christ
Dominus regnavit, decorem indutus est: * indutus est Dominus fortitudinem, et præcinxit se.
2 Etenim firmavit orbem terræ, * qui non commovebitur.
3 Parata sedes tua ex tunc: * a sæculo tu es.
4 Elevaverunt flumina, Domine: * elevaverunt flumina vocem suam.
5 Elevaverunt flumina fluctus suos, * a vocibus aquarum multarum.
6 Mirabiles elationes maris: * mirabilis in altis Dominus.
7 Testimonia tua credibilia facta sunt nimis: * domum tuam decet sanctitudo, Domine, in longitudinem dierum.
Glória Patri.
Ant. O admirábile commércium! Creátor géneris humáni, animátum corpus sumens, de Vírgine nasci dignátus est; et procédens homo sine sémine, largítus est nobis suam Deitátem.
Ant. Quando natus es.
Psalm 99. Jubilate
All are invited to praise Jehovah.
Jubilate Deo, omnis terra: * servite Domino in lætitia.
2 Introite in conspectu ejus, * in exsultatione.
3 Scitote quoniam Dominus ipse est Deus: * ipse fecit nos, et non ipsi nos.
4 Populus ejus, et oves pascuæ ejus: * introite portas ejus in confessione, atria ejus in hymnis: confitemini illi.
5 Laudate nomen ejus: quoniam suavis est Dominus, in æternum misericordia ejus, * et usque in generationem et generationem veritas ejus.
Glória Patri.
Ant. Quando natus es ineffabíliter ex Virgine, tunc implétæ sunt Scriptúræ: sicut plúvia in vellus descendísti, ut salvum fáceres genus humánum: Te laudámus, Deus noster.
Ant. Rubum, quem víderat Móyses.
Psalm 62. Deus, Deus meus
A prayer in desolation and distress.
Deus, Deus meus, * ad te de luce vigilo.
2 Sitivit in te anima mea, * quam multipliciter tibi caro mea.
3 In terra deserta, et invia, et inaquosa: * sic in sancto apparui tibi, ut viderem virtutem tuam, et gloriam tuam.
4 Quoniam melior est misericordia tua super vitas: * labia mea laudabunt te.
5 Sic benedicam te in vita mea: * et in nomine tuo levabo manus meas.
6 Sicut adipe et pinguedine repleatur anima mea: * et labiis exsultationis laudabit os meum.
7 Si memor fui tui super stratum meum, in matutinis meditabor in te: * quia fuisti adjutor meus.
8 Et in velamento alarum tuarum exsultabo, adhæsit anima mea post te: * me suscepit dextera tua.
9 Ipsi vero in vanum quæsierunt animam meam, introibunt in inferiora terræ: * tradentur in manus gladii, partes vulpium erunt.
10 Rex vero lætabitur in Deo, laudabuntur omnes qui jurant in eo: * quia obstructum est os loquentium iniqua.
Glória Patri.
Ant. Rubum, quem víderat Móyses incombústum, conservátam agnóvimus tuam laudábilem virginitátem: Dei Génitrix, intercéde pro nobis.
Ant. Germinávit radix Jesse.
Canticum trium Puerorum Benedicite, omnia opera
Dan. 3, 57-88 and 56
Benedicite, omnia opera Domini, Domino: * laudate et superexaltate eum in sæcula.
2 Benedicite, Angeli Domini, Domino: * benedicite, cæli, Domino.
3 Benedicite, aquæ omnes, quæ super cælos sunt, Domino: * benedicite, omnes virtutes Domini, Domino.
4 Benedicite, sol et luna, Domino: * benedicite, stellæ cæli, Domino.
5 Benedicite, omnis imber et ros, Domino: * benedicite, omnes spiritus Dei, Domino.
6 Benedicite, ignis et æstus, Domino: * benedicite, frigus et æstus, Domino.
7 Benedicite, rores et pruina, Domino: * benedicite, gelu et frigus, Domino.
8 Benedicite, glacies et nives, Domino: * benedicite, noctes et dies, Domino.
9 Benedicite, lux et tenebræ, Domino: * benedicite, fulgura et nubes, Domino.
10 Benedicat terra Dominum: * laudet et superexaltet eum in sæcula.
11 Benedicite, montes et colles, Domino: * benedicite, universa germinantia in terra, Domino.
12 Benedicite, fontes, Domino: * benedicite, maria et flumina, Domino.
13 Benedicite, cete, et omnia, quæ moventur in aquis, Domino: * benedicite, omnes volucres cæli, Domino.
14 Benedicite, omnes bestiæ et pecora, Domino: * benedicite, filii hominum, Domino.
15 Benedicat Israel Dominum: * laudet et superexaltet eum in sæcula.
16 Benedicite, sacerdotes Domini, Domino: * benedicite, servi Domini, Domino.
17 Benedicite, spiritus, et animæ justorum, Domino: * benedicite, sancti et humiles corde, Domino.
18 Benedicite, Anania, Azaria, Misael, Domino: * laudate et superexaltate eum in sæcula.
19 Benedicamus Patrem et Filium cum Sancto Spiritu: * laudemus et superexaltemus eum in sæcula.
20 Benedictus es, Domine, in firmamento cæli: * et laudabilis, et gloriosus, et superexaltatus in sæcula.
The Gloria is not said here.
Ant. Germinávit radix Jesse, orta est stella ex Jacob, Virgo péperit Salvatórem: Te laudámus, Deus noster.
Ant. Ecce María.
Psalm 148. Laudate Dominum
All creatures invited to praise God.
Laudate Dominum de cælis: * laudate eum in excelsis.
2 Laudate eum, omnes Angeli ejus: * laudate eum, omnes virtutes ejus.
3 Laudate eum, sol et luna: * laudate eum, omnes stellæ et lumen.
4 Laudate eum, cæli cælorum: * et aquæ omnes, quæ super cælos sunt, laudent nomen Domini.
5 Quia ipse dixit, et facta sunt: * ipse mandavit, et creata sunt.
6 Statuit ea in æternum, et in sæculum sæculi: * præceptum posuit, et non præteribit.
7 Laudate Dominum de terra, * dracones, et omnes abyssi.
8 Ignis, grando, nix, glacies, spiritus procellarum: * quæ faciunt verbum ejus:
9 Montes, et omnes colles: * ligna fructifera, et omnes cedri.
10 Bestiæ, et universa pecora: * serpentes, et volucres pennatæ:
11 Reges terræ, et omnes populi: * principes, et omnes judices terræ.
12 Juvenes, et virgines: senes cum junioribus laudent nomen Domini: * quia exaltatum est nomen ejus solius.
13 Confessio ejus super cælum et terram: * et exaltavit cornu populi sui.
14 Hymnus omnibus sanctis ejus: * filiis Israel, populo appropinquanti sibi.
Glória Patri.
Ant. Ecce María génuit nobis Salvatórem, quem Joánnes videns exclamávit, dicens: Ecce Agnus Dei, ecce qui tollit peccáta mundi. Allelúia.
Capitulum Cant. 6, 8.
Viderunt eam filiæ Sion, et beatam dixerunt, et reginæ laudaverunt eam.
R. Deo gratias.
Hymnus
O gloriosa virginum,
Sublimis inter sidera,
Qui te creavit, parvulum
Lactente nutris ubere.Quod Heva tristis abstulit:
Tu reddis almo germine:
Intrent ut astra flebiles,
Cæli recludis cardines.Tu Regis alti janua
Et aula lucis fulgida:
Vitam datam per Virginem,
Gentes redemptæ, plaudite.Jesu tibi sit gloria,
Qui natus es de Virgine,
Cum Patre, et almo Spiritu,
In sempiterna sæcula. Amen.
V. Benedicta tu in mulieribus.
R. Et benedictus fructus ventris tui.
Ad Bened. Ant: Mirábile mystérium.
Canticum Zachariæ Luc. 1, 68-79
Benedictus † Dominus, Deus Israel: * quia visitavit, et fecit redemptionem plebis suæ:
69 Et erexit cornu salutis nobis: * in domo David, pueri sui.
70 Sicut locutus est per os sanctorum, * qui a sæculo sunt, prophetarum ejus:
71 Salutem ex inimicis nostris, * et de manu omnium, qui oderunt nos.
72 Ad faciendam misericordiam cum patribus nostris: * et memorari testamenti sui sancti.
73 Jusjurandum, quod juravit ad Abraham patrem nostrum, * daturum se nobis:
74 Ut sine timore, de manu inimicorum nostrorum liberati, * serviamus illi.
75 In sanctitate, et justitia coram ipso, * omnibus diebus nostris.
76 Et tu, puer, Propheta Altissimi vocaberis: * præibis enim ante faciem Domini, parare vias ejus:
77 Ad dandam scientiam salutis plebi ejus: * in remissionem peccatorum eorum:
78 Per viscera misericordiæ Dei nostri: * in quibus visitavit nos, oriens ex alto:
79 Illuminare his, qui in tenebris, et in umbra mortis sedent: * ad dirigendos pedes nostros in viam pacis.
Glória Patri.
Ad Bened. Ant: Mirábile mystérium declarátur hódie: innovántur natúræ, Deus homo factus est: id quod fuit permánsit, et quod non erat, assúmpsit, non commixtiónem passus, neque divisiónem.
Kyrie eléison.
Christe eléison.
Kyrie eléison.
V. Dómine, exáudi orátionem meam.
R. Et clamor meus ad te véniat.
Oremus. Deus, qui salutis æternæ, beátæ Maríæ Virginitáte fecúnda, humáno géneri præmia præstitísti; tríbue, quæsumus, ut ipsam pro nobis intercédere sentiámus, per quam merúimus Auctórem vitæ suscípere, Dóminum nostrum Jesum Christum Fílium tuum: qui tecum vivit et regnat in unitáte Spíritus Sancti, Deus, per ómnia sæcula sæculórum.
Commemoration of St. Joseph, or other Patron Saint.
Commemoration of the Saints.
Ant. Sancti Dei omnes, intercédere dignemini pro nostra omniumque salute.
V. Lætamini in Domino et exsultate, justi.
R. Et gloriamini, omnes recti corde.
Oremus. Protege, Domine, populum tuum; et Apostolorum tuorum Petri et Pauli patrocinio confidentem, perpetua defensione conserva.
Omnes Sancti tui, quæsumus, Dómine, nos ubique ád-juvent: ut, dum eórum mérita recólimus, patrocinia sentiámus: et pacem tuam nostris concéde tempóribus, et ab Ecclésia tua cunctam repélle nequitiam; iter, actus et voluntátes nostras, et omnium famulórum tuórum, in salutis tuæ prosperitate dispone, benefactóribus nostris sempitérna bona retribue, et ómnibus fidélibus defúnctis réquiem ætérnam concede. Per Dóminum nostrum Jesum Christum Fílium tuum, qui tecum vivit et regnat in unitáte Spíritus sancti, Deus, per ómnia sæcula sæculórum. Amen.
V. Dómine, exáudi oratiónem meam.
R. Et clamor meus ad te véniat.
V. Benedicámus Dómino.
R. Deo grátias.
V. Fidélium ánimæ per misericórdiam Dei requiéscant in pace.
R. Amen.
Pater noster, secretly.
V. Dóminus det nobis suam pacem.
R. Et vitam ætérnam. Amen.
